Թեհրանահայ մարզա-մշակութային եօթ միութիւնների հանդիպումը՝ Թեհրանի հայոց Թեմական խորհրդի հետ

Երկուշաբթի, 5 յուլիսի 2010 թ.

Յուլիսի 4-ի երեկոյեան, ազգային առաջնորդարանի դահլիճում, նախաձեռնութեամբ Թեհրանի հայոց Թեմական խորհրդի, տեղի ունեցաւ հանդիպում՝ թեհրանահայ եօթ մարզա-մշակութային միութիւնների ներկայացուցիչների հետ:

Հանդիպման սկզբում Թեմական խորհրդի ատենապետ դոկտ. Աիդա Յովհաննիսեանը նշեց, որ յիշեալ հանդիպումը արդիւնքն է յունիսի 17-ին կայացած խորհրդաժողովի, որի թեման էր «Մեր ազգային նկարագիրը եւ միութիւնների պարտականութիւնները»:

Այդ խորհրդաժողովի արդիւնքում՝ մշակւեցին 32 կէտերից բաղկացած առաջարկներ եւ որոշւեց, որ խորհրդաժողովից մի առ ժամանակ անց յիշեալ եօթ մարզա-մշակութային միութիւնների ներկայացուցիչները նիստ գումարելով՝ քննարկեն ներկայացւած առաջարկները եւ դրանք յղկելով՝ իրականացնեն իրենց միութիւնների յարկի տակ:

Դոկտ. Յովհաննիսեանը նշեց, որ միութիւնների առաջիկայ համատեղ աշխատանքները պէտք է համադրի այս 7-հոգանոց կորիզը եւ Թեմական խորհուրդը չի ցանկանում միջամտել միութիւնների հարցով, իսկ համադրութիւնների գործով միջամուխ է լինելու Թեմական խորհրդի անդամ եւ միութիւնների կապ Սարօ Մկրտչեանը:

Հանդիպմանը Թ. Հ. Թեմական խորհրդից ներկայ էր նաեւ Դարւին Աւագեանը, ներկայ էին հետեւեալ եօթ միութիւնների՝ Հ. Ուս. «Չհարմահալ» միութեան, Հ. Մ. «Արարատ» կազմակերպութեան, Հ. Մ. «Սիփան» միութեան, Ի.Ա.Մ.Մ.-ի, Հ. Մ. Մ. «Րաֆֆի» համալիրի, Հ. Մ. «Սարդարապատ» միութեան եւ Հ. Մ. «Նայիրի» միութեան ներկայացուցիչները:

Ժողովի աւարտին եօթ միութիւնների կողմից որպէս համադրող նշանակւեց Հ. Ուս. «Չհարմահալ» միութեան ներկայացուցիչ Հայրիկ Աղանեանը:

■ Այս լուրը դիտւել է 134 անգամ: