Անթիլիասում իր աշխատանքները եզրափակեց Քրիստոնեայ-իսլամ երկխօսութեան Դ համագումարը

Կիրակի, 30 մայիսի 2010 թ.

Մայիսի 19-ի առաւօտեան Անթիլիասի մայրավանքում բացւած Քրիստոնեայ - իսլամ երկխօսութեան Դ համագումարը, Մեծի Տանն Կիլիկիոյ կաթողիկոսութեան եւ Իրանի միջեւ, մայիսի 20-ի երեկոյեան եզրափակեց իր նիստերը՝ նախագահութեամբ Արամ Ա կաթողիկոսի:
Երկրորդ օրւայ նիստերի ընթացքում ներկայացւեցին չորս զեկոյցներ: Առաջին երկուսը ներկայացրին դոկտ. Աիդա Յովհաննիսեանը (Թեհրանի հայոց Թեմական խորհրդի ատենապետ) եւ Ֆաթհալիխանին՝ նիւթ ունենալով երիտասարդութեան տագնապներն ու դժւարութիւնները: Իսկ վերջին երկու դասախօսութիւնները տրւեցին Գրիգոր ծ. վրդ. Չիֆթճեանի եւ դոկտ. Շեմալիի կողմից՝ նիւթ ունենալով այն մեթոդները, որոնք կարող են կանխարգելել երիտասարդութեան բարոյական անկումը։
Իւրաքանչիւր զոյգ դասախօսութեան աւարտին տեղի ունեցաւ քննարկում, որին մասնակցեցին Իրանի փոխնախագահ Մեհդի Մոսթաֆաւին եւ իրանեան ու հայկական պատւիրակութեանց անդամներ, իսկ Վեհափառ Հայրապետը իր համադրող միջամտութիւններով բանաձեւեց արտայայտւած մտահոգութիւններն ու մտածումները։
Եզրափակիչ յատուկ նիստի ընթացքում երկօրեայ քննարկումների լոյսի տակ եղան առաջարկներ եւ արտայայտւած մտքերի յաւելեալ լուսաբանումներ:
Համագումարների շարքը իր այս չորրորդ փուլով մի նոր փուլ է նւաճել՝ երկու կրօնների միջեւ փոխադարձ յարգանքի, վստահութեան ու գործակցութեան առումով։ Իսկ արծարծւած հարցերը իրենց համամարդկային բնոյթով համագործակցութեան նոր հնարաւորութիւններ ընձեռեցին երկու կրօնների ներկայացուցիչներին՝ միասնաբար դիմագրաւելու համար մարտահրաւէրները:
Որոշւեց, որ առաջիկայ համագումարը գումարւի Թեհրանի Միջկրօնական ու մշակոյթների երկխօսութեան կենտրոնատեղիում, Իրան:

■ Այս լուրը դիտւել է 88 անգամ: