Թեհրանի հայոց թեմի առաջնորդի պատգամը՝ 22 Բահմանի առիթով

Չորեքշաբթի, 10 փետրւարի 2010 թ.

Սիրելի հայրենակիցներ, Այս օրերին կրկին անգամ Իրանի Իսլ. Հանրապետութեան երկնակամարը շողում ու փայլատակում է 31 տարի առաջ տեղի ունեցած Իսլամական յեղափոխութեան փառաւոր յաղթանակի տեսլականով:
Այս օրերին մէկ անգամ եւս Իրանի Իսլ. Հանրապետութեան քաղաքացին ցնծութեամբ ոգեկոչում է իր իսկ յեղափոխութեան 31-րդ տարեդարձը, այն խոր գիտակցութեամբ, որ յեղափոխութիւնը նոր կեանքով ու տեսլականով հոգեփոխեց նրան:
Այո, այս օրերին մենք բոլորս քրիստոնեայ, իսլամ, զրադաշտական եւ հրեայ, միասնաբար եւ իւրայատուկ զգացումներով ու խանդավառութեամբ մասնակցում ենք Իրանի Իսլ. յեղափոխութեան 31-րդ տարեդարձի տօնակատարութիւններին ու նաեւ միասնաբար խոնարհւում յիշատակի առջեւ բոլոր նրանց, ովքեր իրենց կեանքի իսկ գնով պայքարեցին յանուն յեղափոխութեան՝ առաջնորդութեամբ եւ ղեկավարութեամբ հանգուցեալ Էմամ Խոմէյնիի, որը եղաւ խորհրդանիշը Իսլ. յեղափոխութեան եւ դրանով սկսւած նոր կեանքի:
Հանգուցեալ Էմամը իսլամական իր կրօնի խայծով վառւած եւ միւս կողմից էլ իր ժողովրդի սիրով լի սրտով եւ յենւած հաւատաւոր ժողովրդի զօրակցութեան վրայ՝ կուրծք տւեց բռնապետութեան եւ կարճ ժամանակամիջոցում կարողացաւ իր եւ իր ժողովրդի արդար պայքարը պսակել յեղափոխութեան յաղթանակով: Անցած երեսունմէկ տարիների ընթացքում Իրանի պետութեան եւ ժողովրդի ձեռքբերումները կրօնական, հասարակական, քաղաքական, տնտեսական, ճարտարագիտութեան ու ճարտարարւեստի, գիտութեան եւ բժշկագիտութեան, էլեկտրոնային եւ էներգիայի բնագաւառներում վկայութիւնն է յեղափոխութեամբ նւաճւած կեանքի:
Յեղափոխութեամբ Իրանի Իսլ. Հանրապետութեան կեանքում կատարւած ու ամէն օր տեղի ունեցող նւաճումները արդիւնք են նախ երկրում ապրող ու գործող ժողովուրդների եւ կրօնների՝ քրիստոնէութեան, իսլամի, մովսիսականութեան ու զրադաշտականութեան հետեւորդների համատեղ ու ներդաշնակ գործունէութեան եւ իրար հանդէպ ունեցած փոխադարձ սիրոյ ու յարգանքի գեղեցիկ կեանքի:
Երեսունմէկ տարի առաջ սկսւած Իսլ. յեղափոխութեանն իր անվերապահ մասնակցութիւնը բերեց իրանահայ համայնքը՝ իր ողջ էութեամբ, եւ երբ այդ յեղափոխութեան ներքին ու արտաքին թշնամիները փորձեցին իրենց գործակալների միջոցով տկարացնել եւ կամ հարւածել յեղափոխութեանը, ողջ իրանցի ժողովուրդը, առանց կրօնի ու գաղափարի խտրութեան, ոտքի կանգնեց ու պաշտպանեց յեղափոխութիւնը՝ ի գին հազարաւոր նահատակների, որոնց շարքում էին նաեւ հայ հարիւրաւոր նահատակներ: Այսօր եւս իրանցի ժողովուրդը խորապէս գիտակցելով Իսլամական յեղափոխութեան ձեռքբերումները՝ նոյն ոգով գործում ու աշխատում է եւ փորձում է պաշտպանել Իսլ. յեղափոխութիւնը իր այն անարատութեամբ եւ հարազատութեամբ, որ սկսւեց եւ որի հիմքը դրեց հանգուցեալ Էմամ Խոմէյնին:
Իրանի Իսլ. յեղափոխութեան երեսունմէկերրորդ տարեդարձի առիթով ողջունում եւ օրհնում ենք յիշատակը հանգուցեալ Էմամ Խոմէյնիի եւ իր այն գործակիցների, որոնք ժամանակին կային ու հիմա չկան, ինչպէս նաեւ ողջունում եւ շնորհաւորում Իրանի Իսլ. Հանրապետութեան հոգեւոր առաջնորդ այաթ. Խամենէիին եւ իր հոգեւորական ու աշխարհական գործակիցներին, հանրապետութեան սիրելի նախագահին եւ իր անմիջական գործակիցներին ու Իրանի ողջ ժողովրդին՝ այս պանծալի տարեդարձի առիթով:
Փառք բոլոր նրանց, ովքեր յանուն յեղափոխութեան՝ նահատակւեցին, որպէսզի կանգուն ու պայծառ մնայ Իրանի Իսլ. Հանրապետութիւնը:
Հազար փառք իրանցի մեծ ժողովրդին, որ այսօր յանուն իր յեղափոխութեան, արժանապատւութեան եւ միասնականութեան՝ կուրծք է տւել ամէն տեսակ դժւարութեանց, որպէսզի կարողանայ անաղարտ եւ անարատ պահել իր իսկ կերտած յեղափոխութիւնը:

ՍԵՊՈՒՀ ԱՐՔ. ՍԱՐԳՍԵԱՆ ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ
4 փետրւարի 2010
Թեհրան
■ Այս լուրը դիտւել է 256 անգամ: